दर्ता तथा कर प्रणालीलाई एकद्वार प्रणालीमा लैजान चेम्बरको माग

काठमाडौं । नेपाल चेम्बर अफ कमर्सले औद्योगिक फर्म तथा कम्पनी दर्ता तथा कर प्रणालीलाई एकद्वार प्रणालीमा लैजान सरकारसँग माग गरेको छ । बिहिबार उद्योग, वाणिज्य तथा आपूर्ति मन्त्रालयका सचिव अर्जुनप्रसाद पोखरेलसँगको चेम्बरका पदाधिकारीहरुले भेट गरि यस्तो माग गरेका हुन् ।
 

उक्त भेटका क्रममा चेम्बर अध्यक्ष राजेशकाजी श्रेष्ठले हाल उद्योग तथा व्यवसाय दर्तामा रहेको झन्झटिलो प्रक्रिया अन्त्यका लागि पहल एकद्वार प्रणाली कार्यान्वयन गरिदिन सचिव पोखरेलसँग आग्रह गरे ।  ‘उद्योग तथा व्यवसाय सञ्चालन गर्न सरकारका फरक–फरक निकायमा दर्ता गर्न दौडनुपर्ने अवस्थाको जबसम्म अन्त्य हुँदैन तबसम्म औद्योगीकरण तथा उद्यमशिलताको विकास सम्भव छैन । अहिले दर्ता र कर लिने काम एकद्वार प्रणालीबाट नहुँदा व्यवसायीहरूले अनावश्यक झन्झट बेहोर्नुपरेको छ । व्यवसायिक सहजताका लागि र कार्यप्रणली सुव्यवस्थाका लागि अब एकद्वार प्रणालीको आवश्यकता छ । जुन सुधारका लागि सचिवज्युले उचित पहल गर्नु हुनेछ भन्ने हामी व्यवसायीहरु आशावादी छौं’ अध्यक्ष श्रेष्ठले भने ।  

अहिले संघीय, प्रदेश तथा स्थानीय तहका फरक–फरक निकायहरूमा दर्तादेखि करसम्मको प्रक्रियाले गर्दा व्यवसायीहरू मारमा परिरहेको श्रेष्ठको भनाई छ । यस्ता समस्याहरूको एकमुष्ट सुधारका लागि सरकारले अविलम्ब विशेष आर्थिक क्षेत्र (सेज) सञ्चालनलाई प्रभावकारी बनाउनुपर्ने र रुग्ण उद्योगहरू सञ्चालन तथा व्यवस्थापनमा सरकार गम्भीर हुनुपर्ने उनले बताए ।  

छलफलमा उद्योग सचिव पोखरेलले संघ, प्रदेश र स्थानीय सरकारका नीति नियम तथा कानुनबीच तादम्यता मिलाएर व्यवसायिक वातावरण सिर्जना गर्न सरकार प्रयत्नशील रहेको बताए । ‘उद्योग व्यवसायको दर्ता प्रक्रियालाई छुट्ट्याएर सरल बनाउन हामी लागिरहेका छौँ । नीतिमा त्यस्तो खासै समस्या छैनन्, केही व्यवहारिक अप्ठेराहरु फुकाएर जानुपर्छ भन्ने हाम्रो मान्यता हो’ सचिव पोखरेलले भने । सो अवसरमा उनले उद्योग व्यवसाय दर्ता, नवीकरण लगायतका काम जति दिनमा गर्ने भनिएको छ, सोही सीमाभित्र गर्ने गरी निर्देशन समेत दिइने बताए ।

(यो समाचार  रातोपाटी २० फाल्गुन२०७७  मा प्रकाशित लेख बाट साभार गरिएको हो । यो लेखमा व्यक्त रायमा नेपाल ट्याक्स अनलाइनको कुनै संग्लग्नता रहेको छैन )

Media Roundup includes tax related news coverage in media, Nepal and abroad, that we find useful to share to our readers. We do not own the contents of these news articles, and Nepal Tax Online team is not included in the process of publication of these news. We also do not vouch for authencity when publishing. The source of the news article is published at the bottom of each news, where possible.

Social Links