८९० अर्ब कर उठाउने आन्तरिक राजस्व र भन्सार विभागको अठोट

२० असोज, काठमाडौं । मुलुकभित्र व्यापार सहजीकरण, व्यवसायिक वातावरण निर्माण तथा राजस्व संकलनको जिम्मा पाएका दुई निकायले चालु आर्थिक वर्ष २०७७/७८ मा ८९० अर्ब रुपैयाँ राजस्व संकलनको प्रतिवद्धता व्यक्त गरेका छन् ।

आन्तरिक राजस्व विभाग र भन्सार विभागले कोभिड १९ को विषम परिस्थितिका वावजुत तोकिएको लक्ष्य पुरा गर्ने प्रतिवद्धता व्यक्त गरेका छन् । दुबै निकायले हालै वाषिर्क व्यवस्थापन गोष्ठी गरेका छन् ।

उक्त गोष्ठीमार्फत दुई निकायले करीव ९ अर्ब राजस्व उठाउने प्रतिवद्धता गरेका हुन् । चालु आवमा सरकारले कुल १० खर्ब ११ अर्ब रुपैयाँ राजस्व संकलनको लक्ष्य राखेको छ ।

त्यसमध्ये भन्सार विभागको भागमा ४ सय ४० अर्ब २६ करोड रुपैयाँ परेको छ । आन्तरिक राजस्व विभागका भागमा भने ४ सय ५० अर्ब रुपैयाँ राजस्व संकलनको लक्ष्य तोकिएको छ ।

महालेखा नियन्त्रक कार्यालयका अनुसार सोमबारसम्म लक्ष्यको कुल लक्ष्यको १३.४० प्रतिशत अर्थातः १ खर्ब ३५ अर्ब ६१ करोड रुपैयाँ राजस्व संकलन भइसकेको छ ।

ननफाइलरको संख्या घटाइने

आन्तरिक राजस्व विभागले मूल्य अभिवृद्धि करतर्फ यो वर्ष ननफाइलर करदाताका रुपमा रेहका करदाताको संख्या घटाउने बताएको छ ।

विभागले ठूला र मध्यमस्तरीय करदाता कार्यालयको हकमा एक प्रतिशत र अन्य राजस्व कार्यालय र करदाता सेवा कार्यालयमा ननफाइलर करदाताको संख्या १० प्रतिशतमा झार्ने लक्ष्य विभागले राखेको छ ।

आयकरमा समेत नन्फाइफर करदाता घटाउने विभागले जनाएको छ । विभागले यो वर्ष विद्यूतीय माध्यमबाट कर तिर्न सकिने व्यवस्थालाई प्रभावकारी बनाउने समेत बताएको छ ।

यो वर्ष सबै कार्यालयमा बायोमेटि्रक दर्ता प्रणाली लागु गरी चालु आवभित्रै कार्यान्वयनमा लैजाने बताएको छ ।

विभागको एकीकृत कर प्रणालीको स्तरोन्नती गरी कर प्रणालीलाई सूचना प्रविधिमैत्री बनाउने घोषणा विभागले गरेको छ ।

अन्तशूल्क चुहावट नियन्त्रण र अबैध मदिरा नियन्त्रणको कामलाई समेत उच्च प्राथमिकतामा राखी कार्यान्वयन गर्ने विभागले जनाएको छ ।

मुख्य ८ भन्सारको स्तरोन्नति गरिने

यता, भन्सार विभागले भने यो वर्ष भन्सार प्रणालीलाई मजवुत बनाउन भन्सार कार्यालयहरुको स्तरोन्नतिको योजना बनाएको छ ।

करिब ९६ प्रतिशत वैदेशिक व्यापारको अंश ओगट्ने र राजस्व संकलनका दृष्टिकोणले समेत महत्वपूर्ण ८ वटा भन्सार मूख्य कार्यालयमा आवश्यक भौतिक पूर्वाधार र साधनस्रोतले सम्पन्न गराउने विभागको प्रतिवद्धता रहेको छ ।

वैदेशिक व्यापार तथा निकासी/पैठारीको तुलनामा भन्सार एजेन्टको संख्या न्यून रहेको भन्दै यो वर्ष भन्सार एजेन्ट थप गर्ने योजना समेत विभागले बनाएको छ ।

चोरी निकासी निरुत्साहित, भन्सार मूल्यांकनलाई स्वचालित बनाउने कामलाई समेत निरन्तरता दिने विभागको भनाइ छ । ठूला ८ वटा भन्सार कार्यालयमा सघन अनुगमन विधि प्रयोग गरी त्यसका आधारमा आवश्यक सुधार समेत गरिने भएको छ ।

(यो समाचार  अनलाइन खबर २० असोज २०७७  मा प्रकाशित लेख बाट साभार गरिएको हो । यो लेखमा व्यक्त रायमा नेपाल ट्याक्स अनलाइनको कुनै संग्लग्नता रहेको छैन  )

Media Roundup includes tax related news coverage in media, Nepal and abroad, that we find useful to share to our readers. We do not own the contents of these news articles, and Nepal Tax Online team is not included in the process of publication of these news. We also do not vouch for authencity when publishing. The source of the news article is published at the bottom of each news, where possible.

Social Links