बजारमा पठनीय पुस्तक अभाव, करले प्रभाव पारेको व्यवसायीको दावी
२९ साउन, काठमाडौं । आयातका प्रभावित भएपछि बजारमा पठनीय पुस्तकहरुको अभाव भएको छ । साहित्य, इतिहास, राजनीति देखि पाठ्यक्रममा आधारित नयाँ नयाँ पुस्तकहरु बजारमा नपाइने अवस्था बनेको नेपाल राष्ट्रिय पुस्तक बिक्रेता संघले जनाएको छ ।
आर्थिक वर्ष ७६/७७ देखिको पुस्तकमा सरकारी कर नीति यस वर्ष पनि निरन्तर भएको र यसको मारमा पाठक परेको संघका अध्यक्ष लिखत पाण्डेले गुनासो गरे ।
‘पुस्तक माग गर्दै पाठक आउँछन तर सरकारी नीतिका कारण हामीले खरिद गर्न सकेकै छैनौँ, खाली हात फर्काउन परेको छ,’ पाण्डेले भने ।
विश्व विद्यालयको विभिन्न विधाका विषयगत अध्ययनका पुस्तकसमेत ल्याउन नसक्दा विद्यार्थीहरुले अप्ठ्यारोमा परेको संघले जनाएको छ । अंग्रेजी साहित्य, चिकित्सा विज्ञान र गणित तथा अन्तर्राष्ट्रिय इतिहासका नयाँ पुस्तकहरु बजारमा पाइन छाडेको अध्यक्ष पाण्डेले बताए । अघिल्लो वर्ष भित्रिएका पुस्तकहरु लगभग सबै सकिएको पनि उनको भनाइ छ ।
पछिल्लो पाँच महिनामा विभिन्न पुस्तकहरु परिमार्जित भएको, नयाँ लेखक र संस्करण फेरिएको तर त्यस्ता पुस्तक नेपालमा उपलब्ध हुन नसकेको व्यावसायीहरुको दाबी छ । सरकारले पुस्तकमा कर लगाएपछि आयात प्रभावित भएको उनीको भनाइ छ ।
पाठकका रुचीका पुस्तकहरु नहुँदा पुस्तक व्यवसाय करिब करिब ७० प्रतिशतले खस्किएको र त्यसमा पनि कोभिडको समस्या थपिएपछि समस्या झनै बल्भिmएको संघको दावी छ ।
‘सरकारले पनि सहयोग गरेन, हामी पनि समस्यामा छौं, त्यसैले महँगो पुस्तक आयात गरेर बिक्री गर्न उत्साहित पनि छैनौं,’ संघका अध्यक्ष पाण्डेले भने ।
नेपालमा बाषिर्क साढे चार अर्बको पुस्तकको कारोबार हुने गर्छ । जसमध्ये वाषिर्क सवा अर्बको पुस्तक आयात व्यापारमा खर्च हुने गरेको व्यवसायीहरुको दाबी छ ।
गत आवमा सरकारले लिएको कर सम्बन्धी नीति र कोरोनाका कारण पुस्तकको आयातमा ठूलो गिरावट आएको छ ।
भन्सार विभागका अनुसार आव ७६/७७ मा सवा ४७ करोड रुपैयाँ बराबरको पुस्तक र छपाईजन्य वस्तु नेपाल भित्रिएका छन् । जुन अघिल्लो आर्थिक वर्षको भन्दा आधा भन्दा धेरैले कमि हो ।
आर्थिक वर्ष ७५/७६ मा नेपालले एक अर्ब ८ करोड ९० लाख रुपैयाँ भन्दा बढीको पुस्तक र यससंग सम्बन्धित वस्तु आयात गरेको थियो ।ली व्यापारीहरुले पुस्तकको भन्सार घोषणामा कैफियत गर्ने गरेको र भारतीय बजारमा छपाईको भर पर्दा स्वेदशी उद्योग धरासायी बनेको भन्दै सरकारले आव ०७६/७७ देखि पुस्तकमा १० प्रतिशत भन्सार महसुल लगाउने निर्णय गरेको थियो ।
पुस्तकमा कर लगाउने निर्णयविरुद्ध पुस्तक बिक्रेता तथा पाठक बिद्यार्थीले चरणबद्ध आन्दोलन गरे पनि सरकारले उक्त निर्णयलाई चालु आवमा पनि निरन्तरता दिएको छ ।
(यो समाचार अनलाइन खबर २९ श्रावण २०७७ मा प्रकाशित लेख बाट साभार गरिएको हो । यो लेखमा व्यक्त रायमा नेपाल ट्याक्स अनलाइनको कुनै संग्लग्नता रहेको छैन )
Media Roundup includes tax related news coverage in media, Nepal and abroad, that we find useful to share to our readers. We do not own the contents of these news articles, and Nepal Tax Online team is not included in the process of publication of these news. We also do not vouch for authencity when publishing. The source of the news article is published at the bottom of each news, where possible.
